पहिले मात्र होइन अहिले पनि नेपालमा विवाह गरिसकेका विवाहितहरु अविवाहित लेखाएर विद्यार्थी भिसामा जापान आउने क्रम जारी नै छ । कहाँबाट कसले र के कसरी यसको हल्ला चलाए त्यसको जरो भने कसैलाई थाहा छैन । समस्यामा परेपछि मात्रै भित्री कुराहरु बाहिर निस्कन्छन । किन त्यसो हुन गयो त ? भन्ने प्रश्नमा सबैको साझा उत्तर भनेकै विवाहित भन्यो भने जापानले विद्यार्थी भिसा दिंदैन भनेर त्यसो गरेको भन्छन् । तर वास्तविकतामा भने त्यो सरासर गलत हो । उच्च शिक्षा हासिल गर्न जापान आउन चाहने जो कसैलाई पनि विवाह गरेको हो या होइन भन्ने कुरा खानतलासी गर्दैन । त्यसो त विवाह गरेर छोराछोरीका बाबुआमा बनिसकेकाहरु पनि विद्यार्थी भिसामा जापान आएर पढाई पुरा गरेपछि तुरुन्तै परिवार बोलाएर जापानमा नै सेटल भएकाहरु पनि प्रशस्तै छन् ।
जसले विवाह गरेको भएर पनि अविवाहित लेखाएर जापान आए उनीहरुले कस्ता समस्या भोग्न परे त ? केही उदाहरणहरु हेर्नुहोस् ।
विवाह गरेर छोरी समेत पाइसकेका पोखराका रामवहादुर (नाम परिवर्तन) ले जापान आउने बेलामा अनम्यारिड लेखाए । जापानको भिसा पाउन सजिलो हुन्छ भनेर उनलाई नेपालस्थित कन्सल्टेन्सीले नै अनम्यारिड लेख्न सल्लाह दिएकोले उनले सोही अनुसार गरेको बताए । अनम्यारिड लेखेको कारण उनले जापानको भिसा पाएका हुन या होइनन् त्यो उनलाई थाहा भएन । तर विवाह गरेर पनि अनम्यारिड लेखेर आएको हुनाले अहिले उनको श्रीमतीको डिपेन्डेन्ट भिसा पाउन गाह्रो भएको हो भन्ने कुरा उनले अडकाल काटे । दुइपटकसम्म एप्लाई गरिसके तैपनि उनको श्रीमतीको लागि अनुमति पाएनन् । धेरैपटक कारण सोध्न गएका उनलाई एकदिन इमिग्रेसनमा भित्र नै बोलाएर ‘उसो वा जेत्ताई दामे’ भनेर पठाइदिए । यतिबेला उनी अब के गर्ने भनेर सोचेरै दिन काटेका छन् ।
उनी मात्र होइनन् काठमाण्डौका प्रकाश (नाम परिवर्तन) पनि विवाह गरेका अनम्यारिड हुन् । उनलाई पनि अनम्यारिड लेख्यो भने जापानको सजिलै भिसा पाईन्छ भनेर नै अनम्यारिड लेख्न लगाइएको थियो । पढाई सकेर अहिले काम गर्न थालेका उनी जापान आएदेखि घर फर्केका छैनन् । जापान आउँदा अविवाहित लेखेर आएका उनले अहिले श्रीमतीको डिपेन्डेन्ट भिसा एप्लाई गर्न नै नमिलेपछि यताउति सल्लाहको लागि भौंतारिइरहेका छन् । विचमा नेपाल पनि नफर्केकोले अहिले श्रीमती छ भन्दा सीधै ढाँटेको भैहाल्ने कुरा उनी बताउँछन् । विवाह गरेर छोरी समेत रहेको उनको कागजपत्र सच्याउने ठाउँ नै छैन । उनी अहिले निकै पश्चातापमा छन् । नेपालको कन्सल्टेन्सीहरुले के आधारमा त्यसरी अविवाहित लेख्न लगाए उनीहरुजस्ता धेरैलाई अझै थाहा छैन ।
यी माथिको उदाहरण घटनामात्र हो तर यस किसिमको समस्यामा परेकाहरु धेरै छन् । नेपालमा विवाह गरेर छोराछोरी भैसकेर पनि अविवाहित लेखेर जापान आउनेहरु धेरै नै भएको अनुमान गरिन्छ । यो भनेको नेपालको कन्सल्टेन्सीको गलत सर-सल्लाह हुन सक्ने जानकारहरू बताउँछन् । अहिलेसम्म कतिपय यसरी आउनुभयो त्यो भै नै हाल्यो तर अहिले नेपालमा रहेर जापान आउने तयारी गरिरहनु भएको छ भने जे सही हो त्यही नै लेख्नुहोस् । यस्तो व्यक्तिलाई भिसा पाउन सजिलो हुन्छ उस्तो व्यक्तिलाई सजिलो हुन्छ भन्ने नै हुँदैन । भिसा पाउन त त्यो व्यक्तिलाई सजिलो होला जसले सही जे हो त्यही नै लेख्छ र पछि भविष्यमा पनि दुःख पाउँदैन् । त्यसैले यी कुराहरुमा निकै सतर्क हुनुहोस् कि आफले हेरेर मात्र फर्म भर्नुस् अनि बुझाउनुस् ।
