जापान सरकारले मूल्य वृद्धिका कारण महंगीको मारमा परेका न्यून आय भएका घरपरिवरालाई ५० हजार येनको दरले नगद सहयोग दिने योजना बनाइरहेको छ । महंगीबाट राहत दिनका लागि सरकारले यो योजना ल्याउन लागेको समाचार जापानी संञ्चार माध्यमहरुले समाचार छापेका छन् । आवासीय कर छूट दिइएका घरपरिवारहरु यो योजनाका लागि योग्य हुने बताइएको छ ।
रुसले युक्रेनमा आक्रमण गरेयता विश्व बजार आकाशिएको इन्धनको मूल्य र कमोडिटिजको भाउमा भएको वृद्धिको मारमा यिनीहरु नै बढी पर्ने देखिएको छ । यो योजनाका लागि सरकारले चालु आवको सञ्चिति कोषको पैसा चलाउने विचार गरिरहेको छ । नगद वितरण योजनाका लागि करीब ९ खर्ब येन खर्च लाग्ने स्रोतको भनाइ छ ।
अमेरिका र यूरोपेली संघको तुलनामा न्युन भएपनी हालैका महीनामा जापानमा महँगी बढिरहेको छ । कोरोना भाइरसको महामारीबाट सुस्त पुनःबहालीबीच तलब वृद्धि सुस्त रहेको समयमा महँगीले उपभोक्ताहरुको मनोबल नै खस्काउने हो कि भन्ने जोखिम बढिरहेको छ । कोरोना भाइरसको महामारीबाट सर्वसाधारणहरुलाई राहत दिन सरकारले यस अघि विदेशी समेत गरेर सबै नागरिकलाई १ लाख येन नगद वितरण गरेको थियो ।
